كتب : حسن خالد
عادة الناس بـ تخلط بين العمل التطوعي و الخيري و يحطوا البيض كله في سلة واحدة ، مع أن الحقيقة أن العمل الخيري هو مجرد جزء من العمل التطوعي بشكل عام و اللي بـ يشمل في طياته " مبادئ عملية " للاستثمار و الحصول على فرص عمل ممتازة ...
عشان كده خلينا نتفق أن أي عمل بـ يتكون من عناصر أساسية ( الجهد ، الوقت ، الفكر ، و المبادئ و القوانين الحاكمة ) و هي اللي بـ تطبق بالضرورة على العمل التطوعي و عادة بـ تكون النتيجة تحقيق الأهداف و النتايج المخطط لها من البداية و تحصيل العامل لأجره ...
و هنا بقى محل الخلاف لأن في العمل التطوعي مش بـ تحصل على الأجر ده " ماديا " بصورة مباشرة أو في الوقت الحالي ، لكنك بـ تحصل في المقابل على مجموعة نقط بـ تضاف لك في خبراتك و بعضها كمان ممكن تضيفه في سيرتك الذاتية ، و لو هـ نقسم الأجر في الحالة دي لنقط هـ تكون :
1. علاقات ( اجتماعية و رسمية ، النفوذ و الوجاهة ، استثمارية ) .
2. الخبرات الحياتية و العملية .
3. مبادئ الإدارة و العمل الجماعي .
4. كيفية صناعة و توليد الأفكار ( من خلال ممارسة جلسات الـ Brain Storming ) .
5. مبادئ تأسيس المشروعات الناجحة .
و بـ يعتبر الأجر ده تراكمي و مش ممكن تحصل عليه مرة واحدة ، لأنه مرتبط بطول مدة العمل التطوعي ، كل ما تطول تزيد الخبرات و العكس صحيح ...
و لو لاحظتم أني بـ أتكلم عن العمل التطوعي نفسه بشكله العام ، المشكلة في العمل الخيري و اللي دايما الناس بـ تروح له أنه مش شرط يحصل على الأجر ده أصلا و ممكن يحصل ربعه في مقابل مجهود مبالغ فيه – و إن كنت مش ضد العمل الخيري – لكن المنطق بـ يقول طالما أنا عندي استعداد لبذل الجهد ممكن أوزع وقتي و جهدي على العمل التطوعي عامة و كده أبقى أرضيت الرغبة اللي جوايا في أني أعمل خير ، و في نفس الوقت استفدت ماديا فيما بعد ...
ممكن تكون لسه الصورة مش واضحة ... هـ أضرب لكم مثل بـ صديق ليَّ بـ يحب جدا الحملات التطوعية الخيرية و مش بـ يفوت حاجة منها – طبعا جزاه الله خير و ربنا يزيده – لكنه أتخرج و لسّه قاعد من غير شغل !
أكلمه أقوله طالما عندك طاقة طب ما تجرب تشتغل من غير أجر في أي شركة منك تشغل وقتك في حاجة مفيدة و متنساش اللي أتعلمته – على اعتبار يعني أننا بـ نتعلم في الجامعة – و منها تستفيد ماديا و لو مش دلوقتي يبقى بعدين ... كان رده عليا عجيب " أعمل خير أه .. أشتغل لأ " !
و فضل مقتنع بـ الفكرة دي أنه يعمل الخير بدون مقابل – أعمل الخير و أرميه البحر ، مع أن ده مش صحيح لأنك بـ تبتغي الأجر من الله – لكن تشتغل بدون مقابل و يبقى عندك مهارات أكتر ممكن تعود على الخير نفسه – لأنك هـ تبقى أقدر ماديا أنك تصرف في الخير مثلا – لأ محدش ياخد مجهودي بـ بلاش !
فضل هو كده بدل السنة تلاته لحد ما أتوظف في جمعية خيرية ، و أصحابه اللي من نفس دفعته اشتغلوا و بقوا بـ يصرفوا على الجمعية دي !!!
الفكرة مش أنك عايز تعمل خير و ترضي ربنا في نطاق محدود و بس ، فكر بـ شكل أوسع لأن نيتك في أي عمل سواء تطوعي أو استثماري هي اللي بـ تفرق مش شغلك بس ...
ليست هناك تعليقات:
إرسال تعليق