كتير مننا بيستخدموا الميكروباص ان مكناش كلنا كده لكن ايه بقى اللى خلا الميكروباص بااااظ !
قعدت ادور على اجابه للسؤال ده لقيت نفسى بسأل اسأله كلها بتحصل و مش لاقيلها اجابه خلونى اعرضها عليكوا جايز تلاقوا ليها حل معايا ..
ليه سواق الميكروباص يفضل واقف ربع ساعة عشان يركب واحد بس رغم انه ممكن ياخده من الطريق و ميعطلش الناس معاه ؟!
ليه برضو السواق بيحب يركب اربعه فى الكنبه اللى ورا رغم انها قانونا 3 ركاب بس ؟! لا و الغريبه اننا بنركب برضو !
ليه لما البنزين يغلى جنيه الاجرة تزيد 0.25 جنيه رغم ان الجنيه ده مش هيفرق مع السواق تلاته اربعه جنيه اخر اليوم و فى الاخر ياخد الفرق فى جيبه ؟ و الغريبه اننا بندفع !!
ليه السواق برضو يخلى الناس تلم الاجره من بعضيهم و فى الاخر يقولهم مفيش فكه اتصرفوا مع بعض و تلاقى فى جيبه فكه قد كده ؟ و احنا كالعاده بنتصرف !!
ليه السواق مبيحبش يركب الاطفال الصبح رغم انه بيبقى متأكد ان الولد رايح المدرسه و مش بعيد يكون هو ذات نفسه عنده اطفال فى مدارس ؟!
ليه السواق يحب يشرب السيجاره و هو بيسوق و يخنق كل اللى فى العربيه بالدخان و تيجى تكلمه يقولك قربت تخلص يا بشمهندس ؟ هو عرف منين انى مهندس اصلا ! و الغريبه انك ممكن تلاقى اللى جنبه بيقوله معاك ولاعه !
ليه السواق لما يشوف واحد صاحبه فى الطريق يقعده على شماله رغم ان ده هيضايقه فى القعده و مش بعيد يتقلب بينا ؟ لكن الغريبه اننا بنسكت !!
ليه لما السواق يحب يعدي من سواق تانى يقعد يقلبله النور و التانى يرخم عليه ميعديهوش يقوم دايس بنزين و جاى جنبه بس عشان يشتمه ! و المفروض اننا بنسمع عادى !! هو السواق مش واخد باله ان فى بنات و ستات و اطفال راكبين معاه و لا ايه ؟!
ليه السواق لما تقوله على جنب يا اسطى يقولك ما انا عمال اقول من الصبح اللى نازل اللى نازل منزلتش لييه ، استنى بقى و عقبال ما يركن تنسى اصلا انتا كنت عايز تروح فين !!
ليه السواق استاذ نكد و متخصص فى شرايط مصطفى كامل و طارق الشيخ و ناس تانيه معرفش اساميها بس لا ليهم صوت و لا منظر اصلا ؟ لا و لازم تسمع باعلى صوت ممكن يعلى الكاسيت عليه ده ان كان لسه بيتعامل بالكاسيت و مش عامل وصله بالـ mp3 ، و يا سلام بقى لو جالك تليفون و قولتله وطى شويه يا اسطى ، ان وطى الصوت اصلا يفضل ينفخ و يزهقك عشان تخلص المكالمه بسرعه !!
ليه لو العجله نامت او البنزين خلص السواق ينزل يركبك عربيه تانيه و ميرضاش يرجعلك فلوسك و انتا تتصرف !! و احنا كالعاده بنركب برضو !
طب ده كان شويه من عمايل السواقين ، لكن الغريبه ان الميكروباص مباظش بس من عمايل السواقين ، ده خرب من عمايلنا احنا كمان ، لييييه هو احنا اللى كنا بنعمل اللى قولته ده ؟
لا مبنعملش ده بس ما شاء الله كل واحد بيظهر مواهبه فى التدخل فى شئون الغير و ده غالبا بيبقى فى الانماط اللى هقولها دى ..
شاب تيييت : ده يحب يقعد جنب السواق خاصه لزق فيه كده و يولعوا سجاير و هاتك يا دخان و يقرفونا معاهم و يا سلام بقى يحب اوى يسمع " الاجره مع بعض ورا " يعمل فيها المتطوع الشجاع و يقوله ركز انتا مع الاسفلت و انا هلملك الاجره و يقعد يبدع و يطلع عبقرياته فى الحساب علينا احنا بقى ، و احنا برضوو نسكت !
الراجل الغلس : و ده بقى راجل غالبا سنه بين اواخر التلاتينات و نص الخمسينات كده يعنى لسه بصحته و تلاقيه كل شويه يعلق على كلام ميخصهوش اصلا سواء الكلام ده قاله السواق او حتى اى حد من اللى راكبين طب انتا ماااالك بتتحشر فى اللى ملكش فيه ليه ؟ و ده ما بيصدق يلاقى حوار و يمسك فيه ميسبوش بقى !!
العجوز الحكيم : و ده راجل كباره كده معرفش ايه اللى مخرجه من البيت لوحده ، و ده بقى بيحب يمارس دور الحكيم الناصح طول الوقت ، و طول ما هو قاعد تلاقيه يقولك ده زمان كان الواحد يقعد كده و يتمنظر قدام الناس ، و كان رغيف العيش قددد كده ، و يدخلك فى اربعين موضوع فات نص قرن عليهم اساسا ، و يا سلام لو رن جنبه موبايل تلاقيه اتعفرت و هاتك يا شتيمه فى الموبايل و مش بعيد صاحب الموبايل كمان ، بس ده اهو راجل كبير ممكن الواحد يستحمله عشان سنه ..
التوأم المختلف : دول بقى غالبا بيبقوا اتنين صحاب قاعدين يرغوا و صوتهم جايب من اول الميكروباص لاخره و طبعا كل اللى قاعدين بيبقوا فى صمت رهيب مستنيين يعرفوا ايه اخر تطورات الموضوع و دول بقى متعرفلهمش اذا كانوا ولاد ولا بنات ، النوعين بتحصل معاهم و يا سلام لو طلعوا كبار شويه فى السن تلاقى المواضيع سخنت بقى و مش بعيد تقلب بخناقه و اصل انا قولتله يوم ما تيجى تركب السيراميك ما تعمليش الزاويه مايله اوى كده ، معلش ما هو انتا اللى غلطان انك اعتمدت على واحد ابن تييييييييت " حذفت للرقابه " و لو الحوار حريمى و الله انا قولتلها يا اوختشى عفاف دى بت مش ولابد و لسّانه و بتتكلم عالناس كتير ، لا واضح ان عفاف دى وحشه خالص اسم الله عليكى انتى يا ملاك !!
الوليه اللتاته : دى بقى عندها 45 لسان ممكن تكلمك فى اربعين موضوع فى وقت واحد وتركز مع كل الناس و تموت فى الفتوى حتى لو فى الدين تفتى برضو ! و حصلت قدامى بطريقه مستفزه لدرجه انها قعدت تنادى على ناس متعرفهمش من الشارع عشان يجوا يركبوا و اساسا العربيه مليانه لكن ليه و ليه بقى ما هو مكنش حد معبرها اساسا و لا بيسمعلها ما صدقت تجيب ناس ، اه ما انا نسيت اقولكوا اصل الغريبه انهم ركبوا و كانو ستات !!!
البنت الاموره و الشاب اللذيذ : تبقى البنت رايحه الجامعه و لا الدرس فى حالها بس حاطه شويه ميكب و لا حاجه و حاطه سماعه الموبايل فى ودنها و قاعده تسمع اغانى ، بالنسبه لناس كتير المنظره ده بقى عادى جدا ، لكن بالنسبه للشاب اللذيذ المنظر ده لااا ميعديش كده يروح جري يقعد جنبها و يحاول يعرف هي بتسمع ايه و يعملنا فيها ابو الليف بقى و يسمعنا صوته و يبتدى يعاكس من تحت لتحت كده ! طب راعى ان فى ناس قاعده ، بلااااش راعى ان ربنا شايفك انت بتعمل ايه ، و شايفها هى برضو بتعمل ايه عشان انا عارف ان فى ناس هتقولى تستاهل ايه من منزلها من بيتها كده ، يا عم انتااا مااالك ربنا اللى هيحاسبها مش انتا و طالما انتا فصيح اوى كده الاولى انك تنصحها مش تعاكسها !!
النائم و لكن : اخر واحد ده بقى ما شاء الله عليه مبيهموش حد بينام و يسمعنا احلى سيمفونيات بيتهوفن ، غالبا ده بيحصل بالليل ، الراجل معذور برضو راجع من الشغل تعبان ، لكن هو التعب ده هيجى فوق دماغنا احنا و يا سلام بقى لو اندمج اوى و راح مريح على كتفك ! هو يرتاح و انتا تتقلب مرتبه !!
لكن هى دى الاسباب ان الميكروباص ، باااظ ! بصراحه انا مبقتش عارف اذا كانت هى دى الاسباب فعلا و لا السبب فينا احنا اننا بنسكت لما نلاقى حاجه كده ، و حتى لو عايزين نتكلم هنتكلم نقول ايه غير حسبنا الله و نعم الوكيل !!
عرفتوا ليه عندنا ازمه مرور ؟ هل الازمه فعلا فى الشوارع بس و لا فى اللى ماشيين فى الشوارع كمان ! هل الازمه فى عدد العربيات و لا فى اللى سبب زياده عدد العربيات !
مبقولش اننا نبقى منغلقين على نفسنا و منبقاش اجتماعيين بالعكس انا لو بركب مع واحد كل يوم نفس المواصله فى نفس التوقيت و شايف انه كويس لا هو عيب و لا حرام انى اتعرف عليه و ابنى معاه علاقه اجتماعيه طيبه ، لكن ميبقاش واحد اول مره اشوفه لمجرد انه قعد جنبى يقعد يفتحلى محضر وعايز يتعرف عليا بالعافيه ، او يقعد يضايقنى بتصرفاته !!
مبقولش برضو ان كل السواقين وحشين و جشعين و معندهمش ذمه ، بالعكس فى ناس كتير منهم محترمين جدا و رجاله يتشالوا فوق الراس و الله ، و فى منهم شباب خريجين جامعات لولا الظروف اللى خليته يشتغل سواق ميكروباص و هى وظيفه اقل من مستواه العلمى لكن مش عيب و لا حرام انه يبنى نفسه بنفسه من تحت الصفر هى السواقه حرام و لا عيب !
فى الاخر كل حاجه بايظه عندنا ليها سبب ناتج عن سلوك مننا اذا عدلنا على سلوكياتنا احنا الاول هنقدر نجبر الناس و نقنعهم بتغيير سلوكهم و هو ده الحل لأى ميكروباص : بااااظ !!
