الخميس، 22 أبريل 2010

نفسي أعلق واحدة فى دراعي !


انت مرتبط ؟ انتى مرتبطة ؟
سؤال ساذج بنسمعه كتير خاصة وسط شله مراهقين سنهم لسه مجابش 20 سنه !

و لما تيجى تسأل الشاب من دول تلاقى نسبه كبيره منهم بترد عليك و تقولك " نفسى اعلق واحده فى دراعي ! " طب انتا عايز تعمل كده ليه اصلا ؟ فكرت ايه اللى هيترتب على قولتك دى ؟!

و للاسف كالعاده الاجابه بتكون انه يغير الموضوع و يتكلم فى اى حاجه تافهه !

لكن اجابة البنت بتكون مختلفه شوية ، لانك بتلاقيها دخلت فى حاله من الرومانسية و شوية و تلاقى تامر حسنى اشتغل جنبك متعرفش منين و تسمع كلام اتحداك لو عرفت ترد عليه !
طب ده عادي انك تسمعه من مراهقين و فى قبلى كتير اتكلموا عن حلول للمشكلة دى لكن لما تسمع الجملة دى " نفسي أعلق واحدة في دراعي ، فى الحلااااال " من شاب شكله قرب عالتلاتين سنه و بيقولها بحرقه اوى ، هتحس بإيه ؟! مش يمكن ده سبب فى ان المراهقين بيقولوا و بيعملوا كده ؟!
قربت من شاب من دول و سألته انت بتقول كده ليه ؟ بصلى و كأني جاى من الهند و مشي قعدت أفكر ايه هى ابعاد المشكلة لقيت ان المشكلة ليها بعدين أساسيين

 
الأول ، و كما قال أبو الليف ! " لو جبت شقه يقولوا تهييس ! " فى دى الراجل عنده حق
ما هو أصلا هيجيب منين ، واحد متوسط مرتبه 500 جنيه ده المتوسط العام للمرتبات و هو أكيد أقل من كده أو أعلى من كده بكتير بس ده يقتصر على شريحة معينه من الموظفين ..
يعنى عشان يجيب شقه هيقعد يحوش فى المقدم حوالى 12 سنه ! إدينى عقلك !!!

ده غير العفش و المهر و خلافه بقى شوف انت مصاريف الجواز قد إيه ؟ فى حسبه تقديريه كده طلع ان متوسط التكاليف الكليه لجوازه فى مستوى متوسط هيطلع بين الـ 150 : 250 ألف و المفروض ان تلتين المصاريف على العريس ..

لا و اللي يغيظك كمان انك تلاقي أهل العروسة مبالغين فى طلباتهم ، قال إيه نضمن مستقبل البنت ! مستقبل إيه اللى تضمنوه هى البنت سلعه هتبيعوا و تشتروا فيها ، الاسلام عمره ما قال كده و الرسول ( صلى الله عليه و سلم ) قال فى الحديث الشريف " إذا آتاكم من ترضون عنه دينه و أمانته فزوجوه ، إلا تكن فتنه في الأرض أو فساد عريض " [ الألباني ] فساااد فى الارض و جايين تسألوا ليه الشباب .. تيييييت ( حذفت للرقابة ! )

 
و للأسف المشكلة الاقتصادية إمكانيات حلولها ضعيفة جدا ، دي المشكله اللى يقال عليها تجيبها كده تجيلها كده هى كده ! يمكن التخفيف من اثرها فى اننا نبدأ من الصفر و الاهل يصبروا و يسيبوا الزوجين يتعاونوا مع بعض بقى و هنا هسأل سؤال للأهل .. انتوا ليه عايزين ولادكوا يبدأوا من مطرح ما انتهيتوا انتوا ؟! و بلاش الاجابه الساذجه اللى خلاص عافى عليها الزمن و انكوا عايزين ولادكوا يبقوا احسن منكوا و ميتبهدلوش ! هما لو متبهدلوش و اتعلموا من الدنيا هيربوا اولادهم ازاى ؟! و السؤال هنا للأب بالذات اكيد انت كنت شاب زيك زى اللى متقدم لبنتك ليه متساعدوش طالما شايف ان اخلاقه كويسه ، ليه لازم تحبطه ؟؟

التانى ، و ده بقى النووم فى العسل !! المشكلة الأذليه اللى بتتصاعد كل يوم مع كل فيلم رومانسي جديد ألا و هى مشكله فارس الأحلام ، و فتاه الأحلام

 
ركزوا كده مش واخدين بالكوا من كلمه الأحلاااااام دى ؟؟ مش كل اللى بيتقال فى الافلام واقعى و الرومانسيه مش زى ما انتو بتشوفوها عالشاشه كده الناس دى معاها منتجين بيصرفوا ..

 
و الظاهرة دى بقى بصراحه بستغربها فى كتير من الشباب ، تلاقى الشاب من دول مش معاه حتى تمن الشقه و قاعد يحلم بالمواصفات القياسيه لفتاه الاحلام ! و عايز شعرها و عينيها مش مركز خالص فى اخلاقها غير فى كام كلمه حافظينهم كده و دول كمان متكررين عن البنات و المواصفات دى كالتالى : طيب – حنين – بيحبنى ! ده على اساس ان الحب صفه يعنى ! و تلاقى الباقى بقى متناقضات زى هادى – روّش .. الخ من المواصفات ..

مااشى مقولناش حاجه كل واحد و ليه طريقه تفكيره اللى نحترمها ، برضو يا شباب الواحد لما يجي يختار زوجه ليه يختار واحده تربى اولاده و تحافظ عليه كراجل ، مش يختار واحده يتمنظر بيها قدام صحابه ! محدش يستغرب انا سمعت الجمله دى بنفس اللفظ و للأسف كان بيتكلم عن مراته !!

 
و هنا النبى ( صلى الله عليه و سلم ) وصانا فى الحديث الشريف حيث قال " تنكح المرأة لأربع ، لمالها و جمالها و حسبها و دينها ، فعليك بذات الدين تربت يداك " عايز ايه اكتر من كده مواصفات ؟؟

برضو البنت تراعي ان الشاب ده طالع عينه عشان يخليها مش محتاجه حاجه ، برضو حاجه تفرسك لما البنت تقولك انا عايزه واحد شبه ( ....... ) أكمل انت بقى مكان النقط من الشرق و الغرب ! و أكتر صفه تستغربها انها تقولك انا عايزه واحد متدين بس مش متشدد و حط تحت متشدد دى 100 خط ، لأن فى نسبه مش بسيطه من البنات - التافهه - فاهمه التشدد غلط ، مثلا انه يرفض انها تحط ميكب و هى بره البيت ، أو انها تلبس ستايل معين من اللبس ، بجد لا تعليق !!!

 
اقولك على نصيحه يا اختى الفاضله ، لما تيجى تختارى زوج اختارى راجل بجد يوعد و يبقى قد كلامه و بلاش تمشى ورا - اشتغالات - الشباب اللى غرضهم بس يعلقوا ايدك فى دراعهم !

 
أنا اكيد مش هلاقى حلول اكتر من اللى النبى ( صلى الله عليه و سلم ) وصانا بيها ، انا حاولت بس الفت نظركوا ان المشكله مهما كانت كبيره ممكن ننظمها و نختزلها و بكده هنلاقى حلول و ياريت نبطل نقعد نشتكى نشتكي نشتكى من غير حتى ما نعرف احنا بنشتكي من إيه و لمين !