في عالم المغامرات و البحث عن النجاح سر عجيب ، هذا السر لا يكمن في كون الشخص المغامر – الباحث عن النجاح – عاشق للمغامرة ، و لديه الإصرار الغريب على المواصلة و المثابرة إلى نهاية المطاف و الوصول إلى الغاية و الهدف !
السر لا يكمن حتى في انضباطك التام على أداء أعمالك على أكفء درجة ! هل تشعر أن كلامي غريب ؟؟
عااااااااااااااااااااادي
السر حتى مش في الكلام بالفصحى أو بالعامية !
السر مش في صياغة الموضوع و لا طريقة كتابته ، السر لو دوّرت عليه لوحدك هتتعب ما أنت لو كملت معايا هتعرفه لوحدك !
السر حتى لا يكمن في توكلك على الله و توفيقه لك في أعمالك !
إية الكلام الغريب ده انت ازاي تقول كده ؟ انت هتكفر بنعمة ربنا و لا اية !!
ايه اللى مخليك مقتنع أن التوكل على الله هو السر من الأول !!
و طالما عندك القناعة دي من الأول قريت ليه للأخر و لسة بتقرا !!
" التوفيق اللي من عند ربنا ، و توكلك عليه دة شيء مسلّم به في خوض أي مغامرة جديدة " لكن برضو مش دة السر !!
على فكرة السر برضو مش في قانون الجذب و اللي بيقول أن كل حاجة بتفكر فيها بتنجذب ليك من نفس النوع سواء بالسلب أو الإيجاب !!
بصراحة أنا مستغرب عليك إصرارك في أنك عايز تقرا كلمة السر بالشكل ده و حاسس إنى ابتديت أبقى ممل !
Do you want to know the secret ?
السر هو ( ...... ) اكتب أسمك بين القوسين !
هو دة السر اللي كل الناس عارفاه بما فيهم انت ، لكن للأسف عمر ما حد فيهم يقدر يستخدمه حتى انت مفرط فيه لدرجة انك معرفتوش من الأول !
كان عندك أمل انك هتقرا شيء جديد ، أو سر عجيب يجيبلك احلامك لحد عندك على طبق من فضة !
متفتكرش انك مهما قريت عن النجاح و الإيجابية و حاولت مرة و اتنين و تلاتة هو دة اللي هيخليك تنجح حتى لو عملت كل عوامل النجاح اللى سمعتها و قريتها !
طول ما انت مش فاهم نفسك و مقدّر قيمتها كويس أوي ، مهما لفيت و دورت و حققت نجاحات هتلاقى فى حاجات كتير ناقصاك ، استخدم سرّك باحتراف و مش هسيبك قبل ما أقولك على مفتاح استخدامه الأمثل !
حب + أمل + عدسة مكبرة = نجاح كتير كل يوم
الحب : حب قدراتك اللى ربنا وهبها لك هدية و احيانا بتهدر قيمتها ، حب كل الناس اللى حواليك اللى ربنا سخرهم ليك يدعموك و
يقفوا جنبك و سامح اللى حاولوا يحققوا مصالحهم على حسابك .
أمل : لو قعدت تجري ورا هدفك و انت تعيس و بائس و حاسس انك بتزق فى حيطة عمرك ما هتوصلة ، خلي دايما جواك طاقة أمل
ان مهما هدفك بعد عنك فانت هتوصله .
طب الحب و الأمل و عرفناهم ايه بقى حكاية العدسة المكبرة دي !!
العدسة دي بقى يا سيدي هى اللى هتخليك تبص على نفسك من قريب ، تكتشف و تعرف قدراتك و كل الامكانيات اللى جواك ، فتش جوة نفسك و طلّع احسن ما عندك و ساعتها اقدر اقولك ان سرّك هيحرك كل امكانياتك و عوامل نجاحك للغاية اللى هتحطها قدامك !
تجربة بسيطة حط قدامك المعادلة دي و اكتب الـ CV بتاعك و ابدأ و حط هدف و اشتغل عليه و لاحظ التغيرات اللى حصلك في الـ CV كل فترة ، و الكلام دة عن تجربة شخصية
انا استخدمت سرّي باحترافية ، و ان كنت كتبت مرة عن اسرار النجاح فـ تأكد انى مجرب السر دة قبلك و نجح جدا معايا ، تفتكر هينجح معاك ؟؟
